Azərbaycan dünyanın ən güclü ölkələri sırasındadır | SON XƏBƏR | SON XƏBƏR

Azərbaycan dünyanın ən güclü ölkələri sırasındadır

ABŞ-ın «U. S. News & World Report”» jurnalının reytinq siyahısı bunu bir daha təsdiqləyir

Amerikanın «U. S. News & World Report”» jurnalının açıqladığı  2019-cu ildə dünyanın ən güclü ölkələrinin reytinq siyahısında bir çox Avropa ölkəsini qabaqlayan Azərbaycan  45-ci yerdə qərarlaşıb

Sosial, iqtisadi, yol , nəqliyyat,  infrastruktur sahələrində, insanların rifah halının yaxşılaşdırılması istiqamətində ciddi islahatların aparıldığı Azərbaycan  region ölkələri arasında qazandığı uğurları ilə  fərqlənir. Aparılan islahatlar, zamanın çağırışlarına, yeni hədəflərə hesablanmış inkişaf ölkə iqtisadiyyatını gücləndirməklə,  daxili məsələlərin həllini də  sürətləndirir.

«Azərbaycan iqtisadiyyatı inkişaf edir. Mən gələcəkdə iqtisadi sahədə heç bir problem görmürəm. Manatın məzənnəsi artıq üç ildir ki, sabitdir. Əminəm ki, belə davam edəcək. Valyuta ehtiyatlarımız artır. Valyuta ehtiyatlarımız ümumi daxili məhsuldan artıq çoxdur. Xarici borcumuz azalır, yenə də azaldacağıq. Mən göstəriş vermişəm təqribən 10 faizə qədər, indi ümumi daxili məhsulun 17 faizini təşkil edir, 10 faizinə qədər getməlidir. Sənaye artır. Bu il qeyri-neft sənayemiz 15 faiz, kənd təsərrüfatı 7 faiz artıbdır. Davos Ümumdünya Forumu bizi çox yüksək yerlərə layiq görür, o cümlədən islahatların aparılması istiqamətində. İslahatlara meyillilik və rəhbərliyə olan inam əmsalına görə biz dünyada birinci onluqdayıq. Özü də bunu biz yox, Davos deyir. Dünya Bankı nə deyir? Deyir ki, Azərbaycan 20 ən islahatçı ölkə sırasındadır» söyləyən Prezident İlham Əliyevin  qürurla səsləndirdiyi statistik rəqəmlər beynəlxalq təşkilatların hesabatlarında da əksini tapır.

Ölkədə aparılan düşünülmüş siyasət nəticəsində Azərbaycan iqtisadiyyatı sürətlə inkişaf etdiyi kimi, ümumi daxili məhsul üç dəfədən çox artmışdır. Azərbaycana 270 milyard dollardan artıq sərmayə qoyulmuşdur. Azərbaycanın xarici borcu ümumi daxili məhsulun cəmi 17 faizini təşkil edir ki, bu göstəriciyə görə  ölkəmiz dünyada 9-cu yerdədir. Həyata keçirilən sosial islahatlar davam etdirilir. Azərbaycanın əldə etdiyi nailiyyətlərin beynəlxalq aləmdə nümunə göstərilməsi yeganə hal olmadığı kimi, təsadüfi də deyil. Dünya Bankının 2020-ci il üzrə «Doing Business»” hesabatında Azərbaycan ən islahatçı 20 ölkə sırasında yer alıb. Davos Ümumdünya İqtisadi Forumunun hesabatında hökumətin uzunmüddətli strategiyasına görə Azərbaycan dünya miqyasında 10-cu, rəhbərliyin islahatlara meyillilik səviyyəsində isə 5-ci yerdədir.

Beynəlxalq maliyyə təşkilatlarının, reytinq agentliklərinin hesabatlarında qeyd olunduğu kimi, Azərbaycanda biznes mühiti yaxşılaşır, sərmayə qoyuluşu üçün daha münbit şərait yaradılır, yerli və  xarici sərmayələr dövlət tərəfindən lazımi səviyyədə qorunur.   İqtisadi göstəricilər arasında xüsusi çəkisi olan biznes mühitinin yaxşılaşdırılması göstəricisinə görə fərqlənən Azərbaycan  bir neçə ildir ki,  MDB  məkanında və regionda  liderliyini qoruyur.
Göründüyü kimi  ölkə üzrə  əsas iqtisadi və sosial göstəricilər müsbətdir, dinamika təmin edilir. Sevindirici haldır ki,  Azərbaycanın inkişaf modelinin uğurları  beynəlxalq aləmdə  böyük maraqla qarşılanır.

Dünyanın iqtisadi  xəritəsində Azərbaycan   yeni dövlət olsa da,  qlobal layihələrin müəllifi olan ölkəmiz bütün sahələr üzrə  aparılan islahatların   dəyərinə, şaxələndirmə  siyasətinə görə  beynəlxalq reytinq  agentliklərinin hesabatlarında ilk sıralarda yer alır.

Dünya iqtisadiyyatına  uğurla inteqrasiya edən  Azərbaycanın iqtisadi uğurları  növbəti dəfə  beynəlxalq səviyyədə təsdiqlənib. Amerikanın «U. S. News & World Report”» jurnalı 2019-cu ildə dünyanın ən güclü ölkələrinin reytinq siyahısını açıqlayıb. Reytinq ABŞ-ın ən nüfuzlu siyasi nəşrlərinin birinin saytında dərc edilib. Siyahı Pensilvaniya Universitetinin «BAV Group i Wharton School»” Qrupunun analitikləri tərəfindən tərtib edilib. Siyahı tərtib edilən zaman ölkələrin iqtisadi vəziyyəti, hərbi gücü, siyasi təsir dairəsi, dünyada liderliyi, habelə beynəlxalq təşkilatlara üzvlük və iştirakı daxil olmaqla bir sıra amillər nəzərə alınıb.

Dövlətlərin qüdrətini təsdiqləyən bu göstəricilər üzrə  fərqlənən Azərbaycan siyahıda  45-ci yerdə qərarlaşıb. Ölkəmiz cari ildə əldə etdiyi uğurlara görə, bir neçə Avropa ölkəsini – Xorvatiya, Çexiya, Latviya, Rumıniya, Slovakiya, Sloveniya, Estoniya və Portuqaliyanı geridə qoyub.

Göründüyü kimi  beynəlxalq mövqeyi  möhkəmlənən, sivilizasiyalar arasında körpü olan, tərəfdaşlıq  münasibətlərinin möhkəmlənməsinə önəmli töhfələr verən, müəllif olduğu enerji və nəqliyyat layihələrini reallaşdırmaqla  qitələri birləşdirən, tərəfdaşlarının sayı çoxalan,   Qoşulmama Hərəkatına və Türk Dövlətləri Əməkdaşlıq Şurasına eyni zamanda, sədrlik edən , dünyanın ən güclü ordusu sıralarında yer alan, dünya ictimaiyyətinə  «ASAN xidmət» kimi intellekt xidmət təklif edən, beynəlxalq təşkilatlarda  layiqincə təmisl olunan Azərbaycan dünya dövlətləri arasında  fərqli mövqeyi  ilə seçilir.  Qüdrətli dövlət kimi nümunə göstərilir.

Xuraman İsmayılqızı, «İki sahil»


Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Bu HTML etiketlərindən və xüsusiyyətlərindən istifadə edə bilərsiniz: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>